Gilayon nga nangbakwit ang mga residente duol sa usa ka under construction nga Condominiums nga nahimutang sa McArthur Highway, Matina, ning syudad human sa pagtay-og sa magnitude 6.8 nga linog alas-4:14 kagahapon sa hapon, Nobyembre 17, 2023.
Gibana-banaan nga anaa sa 174 ka mga indibidwal ang nanghikling ug temporary karong namasilong sa Barangay 76-A gym.
Dali sab nga gisusi sa ug nagpahigayon og ocular investigation ang mga personahe sa Ecoland Police Station.
Sa inisyal nga imbestigasyon, nasayran nga samtang nagpadayon ang linog, ang crane sa ibabaw sa maong building nag-uyog ug ang counterweight sa maong crane nahulog sa ground floor.
Sumala sa safety officer sa nasangpit nga building, walay natalang casualties human sa insidente sulod sa Paragon, samtang wala pa sab nasayran kung pila ang damyos sa maong panghitabo.
Sa laing bahin, gikataho nga dunay nahulog nga debris padulong sa balay gawas sa Paragon building nga gipanag-iya ni Rogelio Castro Bontardo, 77 anyos, residente sa Almond St., SIR Phase 2, Matina, Davao City, nga nakamugna og gamay nga kadaot sa atop ug kisame ug walay gikatahong casualties.
Hinoon, gipasalig sa PHIVOLCS nga walay bahad sa tsunami human ang magnitude 6.8 nga linog.