Hugot karon nga mipasidaan ang Cagayan de Oro City Police Office Traffic Enforcement Unit sa katawhan, labi na sa mga ginikanan nga mahimong responsabli sa pagbantay sa ilang mga anak aron malikay sa unsa man nga disgrasya.
Kini homan nga sunod-sunod ang aksidente sa kadalanan diin ang biktima sa mga bag-uhay lamang nga insidente mga bata.
Kahibaloan nga sulod lamang sa usa ka adlaw Hulyo 3 ning tuiga, duha ka bata ang patay sa managlahing disgrasya sa kadalanan sa syudad, diin lakip niini ang usa ka tuig ug siyam ka bulan pa lamang nga batang babaye ug 3-anyos nga batang lalaki.
Ang batang babaye na-hit and run sa wala pa mailang driver sa usa ka sakyanan sa Corrales-JR Borja nga sakop sa Barangay 12.
Sumala ni TEU Investigator Police Chief Master Sergeant Raul Ruaya nga wala mabantaye ang maong bata nga naka-abot na sa kalsada homan nga na-busy ang inahan niini sa pag-andam og panihapon.
Samtang, ang 3-anyos nga batang lalaki, aksidente usab nga naligsan ug nalatayan sa usa ka pribadong sakyanan nga gimaneho sa usa 36-anyos nga si Maricris Aranzan sa usa ka subdivision sa Barangay Iponan ning syudad.
Sa imbestigasyon gibutyag ni TEU Investigator Police Staff Sergeant Erwen Bana nga nagdula ang maong bata kilid sa kalsada, dihang kalit lang kini nga midagan padulong sa usa ka sakyanan nga nag-left turn pasulod sa subdivision.
Nasayran nga ang driver niini nga nakaligis, gikustodiya na sa TEU.