KALIBO, AKLAN—Owa pa it “go signal” maghalin kay Department of Education (DepEd) Secretary Leonor Briones do pagpatigayon it face-to-face classes sa 25 pilot schools sa Western Visayas.
Ginpahayag ni Director Ramir Uytico it DepEd Region 6, kung pagapasugtan raya hay preparado man sigon sanda apang kung indi hay indi lang anay pag-ipilit bangud nga maabo pa ru dapat nga i-konsidera.
Dapat man sigon nga mangin mahaeaong bangud nga do ikamayad it eawas ag kabuhi it mga estudyante do nakataya kung siin do pagpabakuna hay owa it kasiguraduhan nga exempted sa pagkalat it virus.
Nasayuran nga kaibahan sa nasambit nga eskwelahan do Laserna Integrated School (Grade 6) sa banwa it Nabas, Aklan, an-um halin sa Sagay City, Negros Occidental, apat sa Iloilo, tig-daywang eskwelaha sa Antique, Guimaras, Passi City, Iloilo, San Carlos City ag Sipalay City, Negros Occidental, ag tig-sambilog man sa Roxas City, Capiz, Kabankalan City ag Cadiz City sa Negros Occidental. //SHERRY ANNE REUNIR-VIDAL