Tulo ka mga sunog ang miigo sa nagkadaiyang dapit sa dakbayan sa Sugbo atol sa pagsaulog sa Mother’s Day kagahapong adlawa, Mayo 9, 2021.
Ang unang sunog nahitabo kagahapon sa alas 6 sa buntag sa Caimito Street sa Barangay Basak San Nicolas.
Gibana-bana nga anaa sa P700,000 ang gibiling danyos sa sunog.
Sa ikaduhang sunog sa susamang barangay, gibutyag sa Cebu City Fire Department nga mitumaw kini sa Sitio Seaside Alumnos diin gibana bana nga anaa sa P1.2 million ang gibiling kadaot.
Gibana-bana nga kapin usa ka gatus ka mga panimalay ang naugdaw apan gipaabot nilang mas daghan ang aktwal nga naugdaw kun maberipika na sa Department Of Social Welfare and Services.
Narespondehan sa kabomberohan ang sunog alas 12:50 p.m. ug na kontrolar alas 1:52 p.m ug hingpit nga na fireout alas 2:19 p.m.
Human sa duha ka oras, laing sunog ang miigo sa Sunrise Village sa Barangay Pardo.
Sa pagbanabana sa City Fire Department, anaa sa kinatibuk-ang P2 million nga ang gibiling kadaot sa tulo ka mga sunog sa siyudad.
Basi sa datus sa Cebu City Social Welfare Services office, anaa sa 120 ka mga pamilya ang nawagtangan ug panimalay diin as of 5 p.m. kagahapon, adunay 549 indibidwal ang natala nga naapektuhan sa sunog.