CEBU –Niabot na sa 61 ka mga barangay sa Central Visayas ang gideklarar sa Regional Oversight Committee on Barangay Drug Clearing Program nga drug-cleared human gipaubos sa makuti nga deliberasyon.
Matod ni Leia Alcantara, information officer sa Philippine Drug Enforcement Agency (PDEA 7), nga ang gideklarar nga drug-cleared mao ang unom ka barangay sa lalawigan sa Bohol, 18 sa Negros Oriental, usa sa Cebu City nga mao ang Barangay Mabini ug ang labing daghan gikan sa probinsya sa Sugbo nga moabot ug 36 ka barangay.
Sa datus sa PDEA-7, sa 3,003 ka mga barangay sa rehiyon, 1,592 na ang drug-cleared ug 116 ang drug-free kun 57 porsiyento sa kinatibuk-an sukad gisugdan ang Barangay Drug Clearing Program niadtong 2017 ubos sa administrasyon ni kanhi Presidente Rodrigo Duterte.
Samtang atol sa State of the Nation Address ni Presidente Ferdinand “Bongbong” Marcos Jr., giklaro niini nga magpadayon ang gubat sa ilegal nga drugas.//