Ginkunfirmar ni NBI – Bacolod agent-in-charge Atty. Renoir Baldovino ang pagpasaka sang kaso nga paglapas sang Presidential Decree 1602 ukon Republic Act 9287 batok sa mga persona sa likod sang peke nga operasyon sang Small Town Lottery nga nagapatay nga wala sang prangkisa gikan sa Philippine Charity Sweepstakes Office ukon PCSO sa banwa sang Binalbagan kag sa syudad sang Sipalay.
Ang mga ginpasakaan sang kaso ginkilala kanday Dinah Katalbas Surigao, legal ang pang-edaron kag pumuluyo sang Kalye 2, Zone 2 , Brgy. Payao, Binalbagan, Leizel Trembol , may mga aliases nga Val, Mookey kag Nonoy, wala sang address kag subong man kanday Joevel Espora, legal ang edad residente sang Brgy. 5 syudad sang Sipalay kag Liczl Rentoy kag tatlo ka mga John Does, tanan legal ang mga pang-edaron, wala mahibaluan ang address apang ginapatihan nga kilala ni Espora.
Ginpahayag ni Atty. Baldovino ang apat ang magapangatubang sang 12 tubtub sa 14 ka tuig nga pagkabilanggo.
Ang mga ginpasakaan sang kaso naga-operar sang peke nga STL sa idalom sang kumpaniya nagahingalan sang Vikings Peryahan ng Bayan.
Ang ila sini mga bet collectors ukon mga kuridor nagakolekta sang pataya gikan sa publiko kag naggagamit sang resulta sang bola base ukon pinaagi sa Live Facebook video sang FB accoiunt sang Vikings Peryahan ng Bayan.
Samtang, naaresto sang NBI ang persona nagahingalan kay Gilberto Onde, residente sang South Ceres Terminal. Lopez Jaena St., Barangay 31, Bacolod City sa pagbiolar sang Republic Act 9287 partikularmente sa paggamit sang peke nga ID sang PCSO kag sa pagkolekta sang pataya sa STL.