LEGAZPI CITY – Inihayag ng Albay Public Safety and Emergency Management Office (APSEMO) na kinakailangan ang long-term na paghahanda para sa posibleng pagtama ng El Niño sa bansa.
Sa panayam ng Brigada News FM Legazpi kay APSEMO Chief, Dr. Cedric Daep, sinabi niya ang epekto nito ay maaaring maranasan hanggang sa pagtatapos ng taon o kaya naman sa unang quarter ng taong 2024.
Ayon sa kanya, ang may pinakamalaking preparasyon at kailangang tutungan ay ang sektor ng agrikultura sa lalawigan.
Aniya, dapat sa ngayon ay naghahanda na ang Provincial Agricultures Office nang sa gayon ay maaga ring makapagtanim ang mga magsasaka.
Ito umano ay mainam na paraan upang maaga rin silang makapag-ani ng kanilang mga produkto at makapag-ipon ng budget.
Bukod dito, ayon kay Daep, kinakailangan ding planuhin ng bawat munisipyo at lunsod ang tubig sakaling magkaroon ng kakulangan ng supply nito.
Maliban pa sa mga ito, ang kalusugan ay isa rin sa nararapat na paghandaan, kung saan kinakailangang maturuan ang mga residente na magsanitize ng mga tubig o magfilter kung mayroong source na hindi malinis upang maiwasan ang mga sakit.
Kabilang din umanoa ang livestock sa mga dapat na tutukan sa pagtama ng El Niño.
Samantala, sinabi niya na nagkaroon na sila ng pag-uusap kasama ang mga DRRMOs sa bawat LGU kaya’t tiniyak ni Daep na sa ngayon ay naghahanda na sila.