OPISYAL nang gitagaan og lisensya ug accreditation sa Department of Health ang tulo (3) ka Level I municipal hospital sa probinsya sa Sarangani nga mag-operate isip COVID-19 center. Gilangkuban kini sa Malungon Municipal Hospital, Glan Medicare Community Hospital ug Dr. Cornelio Martinez Sr. Memorial Hospital sa Kiamba.
Sila tanan ang gipanag-iyahan ug gipadagan sa Sarangani Provincial Government ubos sa superbisyon sa Sarangani Provincial Health Office. Lakip nga gitagaan og pagtugot sa DOH nga makadawat og mga pasyente nga natakbuyan og Coronavirus ang mu-abrihay nga Sarangani COVID-19 Center nahimutang sa Ladol-Kawas, Alabel, Sarangani Province nga mag-operate sunod na semana pohon.
Kining upat (4) ka pasilidad ang mudungag ug mutabang sa Sarangani Provincial Hospital nga nagsilbing provincial COVID-19 isolation facility gikan pa sa pagsugod sa pandemya niaging tuig. Gipaningkamutan pud karon nga mahimo na nga Level 2 hospital ang provincial hospital sa Sarangani Province.
Sa pakighinabi ngadto kang Gov. Steve Chiongbian Solon, gibutyag niini nga malipayon siya nga walay kakulian nakita ang taga-DOH atol sa aktwal nga inspeksyon sa maong mga hospital hinungdan nga paspas kining natagaan og lisensya isip dungag pasilidad sa COVID-19. Kay kini mga pampublikong hospital man, mugawas na lang ang pasyente sa COVID-19 nga wala nay pagabayran.