Patay ang usa ka indibidwal human nga gi-yano yano ug gitigbas ning milabayng adlaw alas 10:30 ang takna sa buntag sa may Purok-7 Acnit, Brgy Caigangan lungsod sa Veruela lalawigan sa Agusan del Sur.
Gikumpirma mismo ni Police Lieutenant Allan Badajos ang hepe sa Veruela Municipal Police Station atol sa tira brigada program nga ang biktima mao si Nilo Jaron Goliat, 35 anyos, ulitawo, mag-uuma ug residente sa Purok-7 Aknit, Brgy Caigangan sa gikabutyag nga lungsod. Samtang ang suspek mao si Rudy Galvez Maravillas Jr, 48 anyos, ulitawo, mag-uuma ug residente sa gikabutyag nga lugar.
Base sa ilang inisyal nga imbestigasyon nga samtang nag inom ang biktima ug suspetsado mi-abot kini sa panaglalis ug dayon gihagit nga makig-away. Sa maong panghitabo dali gilayong mikuha ug sundang ang suspetsado dayon tigbas sa biktima sa makadaghang higayon nga miresulta sa kamatayon niini gumikan sa mga naangkon nga mga samad sa kalawasan.
Sa pagkakaron padayon gihapon ang gibuhat nga imbestigasyon sa kapulisan kalabot na sa nahitabong pag panigbas.
