BICOL – KASABAY kan pormal na pagpupuon kan lokal na karampanyahan ngunyan na aldaw, pigtutugutan na man an mga kandidato asin saindang mga political parties sa Bicol na magsagibo nin house-to-house campaign.
Segun mismo kay Atty. Jasmin Belarmino, election supervisor kan COMELEC-Bicol, an bagong kasuguan an base sa Comelec Resolution 10732 o an May 2022 election campaign guidelines.
Pigtutugutan kan resolusyon an pagsasagibo nin house-to-house campaign ativities alagad higot na ipinagbabawal an paglaog sa mga harong dawa pa may permiso gikan sa mga maysadiri.
Dagdag pa kaini dai na man kinakaipuhan na magkua nin mga kandidato nin permits gikan sa sainda alagad dapat man na mag-comply sa kun ano an ipigtalaan kan nakakasakop na barangay asin LGU siring man sa mga reglamentos kan Inter-Agency Task Force.
Katakod kaini padagos an apela kan komisyon sa mga kandidato, pati na sa publiko na padagos na sunudon an mga eksistidong minimum health standards mantang nakikisumaro sa mga campaign-related activities.
Liwat man na pinagiromdom ni Belarmino an mga ‘additional procedures’ na ipapapautob sa mismong araw kan botohan kun saen magkakaigwa nin temperature checking asin madesignar man nin mga isolation polling place (IPP) asin medical personnel na mag-eeksamin sa mga botante kin igwang sintomas nin covid-19.
Mantang igwa soboot pigkakarkolong 3.9 million na mga botanteng Bicolano na piglalaoman na makikisumaro sa May 2022 National asin Local Elections.