Gisang-at na sa Land Transportation Office XI ug Land Transportation Franchising and Regulatory Board ang reklamo kalabotan sa viral video sa social media diin nasuko ang taxi driver ngadto sa iyang pasahero.
Kini human nga paspas nga giaksiyunan sa Traffic Enforcement Unit (TEU) sa pagpanguna ni PLtCol Dexter S Domingo, labaw sa TEU ug gimanduan ang mga sakop ang paadtuan ang kompanya sa maong taxi.
Sa pagpatawag sa wala nganli nga taxi driver, gibutyag niini nga duna lamang wala pagsinabtanay batok kanila sa maong babae.
Subay sa post sa usa ka alyas Aline, igo lamang sumala pa siya nga nangutana nganong wala sila niagi sa Dumanlas gikan sa Piapi ug padulong unta siya sa Catitipan. Apan kalit lamang sumala pang nisyagit ang maong driver dungan sa pagpamalikas ngadto kaniya.
Giawhag na lamang ni PLt.Col Dominggo nga ipadangat sa pasahero o si bisan kinsang makasinati og dili maayo, ang ilang reklamo ngadto sa tukmang ahensiya sa gobyerno.BNFM-DAVAO