MAPASALAMATON ang halos 20 ka mga doktor sa Brigada tungod sa paglusad sa maayong adbokasiya, nga mao ang End Stunting Now.
Gipahigayon sa Brgy. Lagao gym ang aktibidad, Enero 21 ang launching sa End Stunting Now advocacy nga nationwide usab gipahigayon sa 50 ka FM stations sa Brigada.
Mismo ang Presidente sa Pediatric Association sa GenSan nga si Dr.Romeo Reyes, ang nagkanayun nga dakong tabang ang maong programa aron nga mapugngan ang pagkabansot sa mga bata.
Ang hinungdan matud pa niini, mao ang kakulang sa igong nutrisyon mao nga angayang makahibalo ang mga ginikanan sa importansya sa pag-atiman sa bata nga manukad sa sabakan hangtud sa 1,000 days nga pag-amoma.
Dungan niini sobra 80 ka mga bata gikan sa GenSan ang nakabenepisyo sa libreng konsulta, bitamina ug tambal asa ang ubang doktor may mga sample sa tambal nga gihatag.
Mitambong usab si Dr.Brick Mirabueno, ang president sa Philippine Medical Association kun PMA GenSan ug Dr.Ruschelle Veligano, OB Gyne alang sa paghatag og lecture sa 50 ka mga buntis.
Si City Nutritionist Imelda Arce Silvero ang mihatag usab og mga pagtulon-an unsaon malikayan ang stunting o pagkabansot sa bata.
Gidalikyatan usab sa Brigada Executives sa pagpanguna ni Chairman/CEO Elmer V.Catulpos ug Vice Chair Yelcy Yasay Catulpos ang maong launching ug nalipay sa suporta sa mga doktor sa GenSan, labi na sa mga pediatricians, mga barangay health workers sa Lagao ug sa tanang mitabang aron magmalampuson ang aktibidad.