Malipayon nga gidawat sa mga residente nga sakop sa tribong Bagobo Klata ang kongretong taytayan nga gimugna sa mga sakop sa Revitalized-Pulis sa Barangay (R-PSB) Cluster 5 sa Purok 7, Barangay Cadalian, Baguio District, Davao City niadtong milabayng adlaw.
Ang nasangpit mao ang xynus footbridge nga gitaoran pa og solar light nga gitukod sa R-PSB Cluster 5 sa pagpanguna ni Plt Rizalito Clapiz III ubos sa pagpangulo ni PltCol Nolan Raquid kon asa gipahigayon ang turn-over ceremony.
Kahibaluan nga nahimo nang problema sa mga residente sa maong purok ang huyang nga taytayan nga gama sa kawayan ilabi na kong mag-ulan gumikan delikado kini sa naghaguros nga baha.
Mamahimo na usab nga mamonitor sa mga residente ang tubig sa sapa panahon sa kagabion gumikan usab sa gitaod nga 80-watts solar light sa mga pulis.
Sa pagkakaron masmahimo nang luwas ang pagtabok-tabok sa mga residente sa maong sapa og masmalayo sa peligro panahon sa baha. BNFM-Davao