NAGA-ASSUME gihapon ang labaw sa Comelec – GenSan nga may posibilidad nga madayun ang Barangay ug SK elections sa December 5, 2022.
Kini segun pa kang Atty. Sittie Sharmaine Papandayan- Garangan bisan pa kon naaprobahan sa third and final reading sa Kongreso ang sogyot nga postponement.
Apan gitino sa City Comelec Officer nga anaa gihapon sa Pangulo ang pagdesisyon kung madayun o dili ang eleksyon.
Usa niini mao ang puruhan nga i-veto sa Pangulo ang gipasa nga postponement bill sa Kongreso ug maabtan sa calendar of activities nga filing sa COC sa October 22 hangtud 29.
Tungod niini, bisan walay kasiguruhan nga madayun o dili, padayun sila sa ilang orihinal nga calender of activities ug karon anaa na sila sa pag-andam sa Posted Computerized Voters List ug Election Day Computerized Voters List
Ugaling madayun, awhag ni Atty. Garangan sa mga aspirants sa Brgy ug SK elections nga mangandam lang gihapon aron dili sila kulangon sa oras.
Samtang kung dili usab madayun, gituohan niini nga magpahigayon na usab sila og registration aron mahatagan og tsansa ang wala pa narehistro ug mag transfer og lugar.
Nasayran nga subay sa pinakaulahing instruction matud pa kanila gikan sa Comelec chairman, nga ipadayun lang gihapon ang preparasyon bisan naaprobahan sa third and final reading sa Kongreso ang sogyot nga postponement sa Barangay ug SK elections.