NAKAKITA og sumbagay ang labaw sa Bulaong Terminal sa paghawan niini sa dalan sa terminal, Septembre 7 sa kasamtangan nga tuig.
Sa impormasyon nga nadawat sa Brigada usa ka lalaki ang niadto sa City hall kay magpatabang kay nasumbagan daw siya sa labaw sa Bulaong Terminal nga si Jong Facurib ug nabalaka sa iyang kahimtang.
Sa pagpanubay sa Brigada kay Facurib kon unsa ka tinuod ang impormasyon ,gikumperma ni Facurib nga tinuod nga nakakita kini og away sa dihang nagpatuman sa polisiya sa terminal batok sa mga nagatorno nga nga tricycle ug habal-habal sa area.
Alegasyon ni Facurib nga mga violators ang iyang gisita sa pagpatuman sa public order sa terminal ug ang uban nipatuo, nisibog, nigawas apan adunay usa ka driver nga niduol kaniya unya nisulti og hait nga pulong batok kaniya mao nga nagkatinubagay sila hangtud nga gisultihan usab daw niya ang driver og pulong nga bastos.
Gidugang ni Facurib nga nisangko sa pagpanumbag ang ilang lalis, nasumbagan daw siya sa nawong unya nakabalos pod siya og sumbag hangtud nga giulang sa ubang personahe sa terminal.
Tungod niini nagpa-medical na si Facurib og planong mopasaka og kaso sa driver nga direct assault, nailhan usab daw niini ang driver sa pangalang Ariel nga taga Barangay Calumpang.
Samtang abli ang Brigada sa pagdawat sa unsa mang pahayag sa driver.
Gisusi na usab sa Brigada sa Pendatun PNP apan walay natalang susama nga panghitabo sa petsa nga Septembre 7. ( Ever Diazon)