LAING 15 ka mga unit sa electric jeep ang niabot sa Gensan nga inutang sa Ladotransco milabay nga semana ug nagadagan na sa kadalanan sa syudad.
Sa kumpermasyon sa chairman sa Ladotransco nga si Robert Cang, 15 ka unit ang bag-ong niabot milabay nga semana, nadugang kini sa unang nagadagan na mao nga sa sumada anaa na sa 41 ka electric jeep ang ilawom sa ilang kooperatiba.
Ang 15 gidugang sa nagabyahe sa Calumpang ug Doña Soledad, 10 sa Barangay Calumpang unya lima sa Doña Soledad, Labangal human na kumpleto ang mga requirements.
Gidugang ni Cang nga niabot na usab sa P130 million pesos ang ilang nautang sa banko aron ipalit og modern jeepnies sibo sa plano sa kalamboan sa transportasyon sa nasudnong gobyerno samtang aduna pay dul-an P200 million pesos ang ilang ginaproseso niining panahuna sa DBP.
Sa karon adunay 72 ka units sa electric jeep ug Euro 4 ang gipadagan sa Ladotransco, aduna pa silay kulang sa target nga 185 ka mga units sa ilang mga rota.
Ang makasakay sa electric jeep anaa sa 32 ka mga pasahero apan gumikan sa pandemya anaa lang sa 18 ka pasahero ang ilang ginapasakay. Ang panawagan ni Cang sa ilang mga pasahero nga mosunod sa health protocol kay nitaas ang kaso sa COVID-19 sa syudad, unya mas maayo daw nga mogamit topcard aron malikayan ang contact sa pagsakay. ( Ever Diazon)