Ginaimbitahan it Munisipyo it Kalibo ro mga Ati-Atihan Bands nga mag intra sa Balik-Patik Battle of the Ati-Atihan Bands 2024.
Base sa Kalibo Ati-Atihan Festival Board (KAFEB), mabahoe nga premyo ro nagahueat sa mga magaintra.
Ro nasambit nga contest hay para sa tanan nga mga Aklanon nga Ati-Atihan Bands nga may daywang dag on eon bilang banda, ag dapat may 15 nga miyembro nga may mga drums, lire ag iba pang instrumento, ag may 10 miyembro nga naka costume ro kada Ati-Atihan Group Band.
Ro unang 15 nga mga banda nga makapag-palista hay igapabahin sa opisyal nga listahan it Balik-Patik Contest.
Ro kopya it Registration Form hay kinhangean nga isumite sa taeatapan it KAFEB sa 2nd floor it Ati-Atihan Museum, Pastrana Park, Kalibo.
Ro registration hay nag umpisa eon ku November 15 hasta December 28, 2023.
Ro 1st place hay P50,000; 2nd place P40,000; 3rd place P30,000 ag ro mga special awards hay ro Best in Costume ag Most Jolly group nga may parehung tig P10,000 ro premyo; samtang ro subsidy it kada banda hay tig P20,000. // ANN DESLENE SALAZAR