Narekober ang libo’an ka dinamita sa Sitio Malinao, Barangay Kalasungay, Malaybalay City, Bukidnon, pinaagi sa gihimong pagbulgar sa kanhi membro sa CPP-NPA nga mitahan sa gobyerno.
Muabot sa 1,076 nga dinamita ang nakalot sa 8th Infantry “Dependable” Battalion, Philippine Army, Bukidnon Provincial Intelligence Unit, Bukidnon Provincial Explosive Ordnance Disposal and Canine sa nahisgutan nga area.
Matud ni Ronald Landasan alias Gamay/Gaspar, 47-anyos, kanhi Squad Leader sa Sentro De Gravidad Dario, Guerilla Front 89, Sub-Regional Committee 2 North Central Mindanao Regional Committee nga ang mga nakalot nga dinamita gamiton sa rebeldeng grupo isip Anti-Personnel Mine.
Subay niini gibutyag ni 8th Infantry Battalion Philippine Army Commander Lt. Colonel Edgardo Talaroc Jr., nga nakig-alayon na sila sa Philippine National Police aron makapasaka sa tukmang kaso batok sa komunistang grupo.
Tataw matud pa kini nga kalapasan sa Ottawa Convention nga nagadili sa pagbuhat, pag-tigom, paggamit ug pagbalhin sa mga anti-personnel mines.
Plano sab nila nga imbestigahan kinsa nga mga tao o grupo nga nahimong source og mihatag sa maong mga dinamita aron mapasakaan usab og kaso.
Ang mga dinamita nga narekober, giturn-over na sa Bukidnon Provincial Explosive Ordnance Disposal and Canine alang sa tukmang disposition. -END-