Tutulungan ng Department of Migrant Workers (DMW) ang mga Overseas Filipino workers (OFW) na biktima ng illegal recruitment sa Italy.
Ayon kay DMW Undersecretary Bernard Olalia, papautangin nila ang mga biktima depende sa magkano ang halaga ng umano’y naloko sa mga ito.
Aniya, makikipag-ugnayan sila sa abogado sa Italy upang tulungan ang mga biktima na maghain ng kaukulang kaso.
Sinabi naman ni Consul General Elmer Cato na humigit-kumulang 33 ang nabiktima sa naturang scam at suma total nasa P39M ang nawala sa kanila.
Dagdag pa ni Cato, nakikipagtulungan ang DMW kasama ang Justice and Foreign Affairs Department upang matugunan ang kaso.
Una nang sinabi ng DMW na magpapadala sila ng fact-finding team sa Italya para imbestigahan ang mga paratang sa dalawang kumpanya.