Makabaton sang tig-P10,000 ang ginabanta 103 tanan ka mga pamilya nga apektado sang sunog nga nagluntad sa Rizal Street, Brgy. VII, Roxas City sadtong tinalikdan nga adlaw sang Martes, Pebrero 27.
Ini ang ginkumpirma ni Joselito Estember, Assistant Regional Director sang Department of Social Welfare and Development Region 6 sang ini ang personal nga nagpadulong sa evacuation center.
Pila sa ila mga ginpangdul-ong nga bulig amo ang food packs, family kits, sleeping kits, hygiene kits, kitchen kits kag madamo sang iban pa.
Suno kay Estember, sang nagluntad ang sunog gilayon sila nga ginpahibalo sang City Government rason nga madasig nakaabot ang bulig.
Ginpasalig man sini ang namatyan nga pamilya nga ang DSWD na ang magasabat sa mga kinahanglanon agud mapabulong ang bangkay nanday Nenita Villaruz kag Nestor Clarito.
Ginasiguro sang nasambit nga ahensya nga magasuporta sila sa mga nasugogan tubtob makahalin sa bag-o nga lugar nga paga-istaran. | Judy Ann Juare