Tugpa sa balay tambalanan ang motorista human sa nahitabong bangga tali motorsiklo ug trak sa Carlos P. Garcia Highway, Brgy. Matina, ning dakbayan sa Davao.
Ang nalambigit mao ang motorsiklo nga gimaneho ni Charlito Macario Petalino, 49 anyos ug residente sa San Antonio, Cebu City ug ang Trailer Truck nga gimaneho ni Reymart Francisco Peduchino, 31 anyos, ulitawo ug residente sa Purok Talisay, Ampon, Malingon, Sarangani Province.
Ayha paman ang aksidente sa dalan, gisubay sa duha ka mga sakyanan ang Carlos P. Garcia Highway padulong Bangkal gikan sa north direction diin gi-okupar sa motor ang outer lane portion samtang ang truck anaa sa middle lane portion sa dalan.
Pag-abot sa naasoy’ng dapit sa insidente, nagkabangga ang duha ka sakyanan hinungdan nga natumba ang motor ug nakaangkon og grabeng samad sa lawas ang driver nga daling gidala sa SMPC.
Gidala ang mga nalambigit nga sakyanan lakip na ang driver sa truck sa Talomo Police Station alang sa tukmang disposasyon.