LEGAZPI CITY – Nagkapirang mga aktibidad an pigkondusir ngunyan na aldaw sa syudad kan Ligao sa pangengenot ni City Mayor Fernando Gonzales komo parte kan pagseselebrar nin Women’s Day 2023.
Kaibahan sa mga pigkondusir iyo an unity walk asin wellness dance sa Ligao City Pavilion, asin sa People’s Hall, New Ligao City Hall iyo an libreng mga serbisyo sa mga kababaihan siring kan basic nail cleaning, foot spa asin haircut; bloodletting activity; solo parent program inquiry; asin Public Employment Service and Advocacy Program (PESO) inquiry.
Nagtao nin mga mensahe an bise alkalde na si Jaypee David, asin an dating alkalde na presenteng Ligao Womens Vlub president linda Gonzales sa naunambitang aktibidad na pinagpartisiparan nin mga kababaihan hale sa manlain-lain na sektor poon sa ahensya-nasyonal sundo sa barangay organizations.
Susog ini sa Acta Republika 6949 na nagdedeklarar sa Marso 8 kan taon komo National Women’s Day na may obhetong magtao nin pagbisto sa mga kontribusyon kan mga Pilipinong babae sa nasyon.