Posibleng sunod nga semana ipatuman na sa Davao Region ang Semi-closed border nunot sa pag-apruba sa Regional Inter Agency Task Force sa hangyo sa City Government of Davao.
Gibutyag ni Department of the Interior and Local Government (DILG) -11 Regional Director Alex Roldan nga gihan-ay na lamang karon sa lokal nga kagamhanan ang resolution ayha kini ipatuman gumikan kay kini ang mihangyo nga ipatuman ang maong lakang.
Atol sa pagsugod sa maong polisiya, pangayuan na negative RT-PCR test results nga dili molampas sa 72 ka oras ang tanang mosulod sa Rehiyon Onse ilabi na ang naggikan sa kasikbit probinsya.
Gawas niini susihon sa otoridad ang tumong sa mga byahero sa pagsulod sa Rehiyon kung kini ba essential o mahinungdanon.
Giklaro usab sa kamanduan nga ang mga taga dakbayan sa Davao nga moadto sa kasikbit nga lalawigan aron lamang mosuroy kinahanglan nga magdala ug negative RT-PCR test results sa pagbalik niini.
Tumong sa pagpatuman sa semi closed border aron makontrola ang paggawas sulod sa mga tawo tungod sa mga natalang bag-ong variant sa COVID-19.
Hinoon sa pagkakaron wala pay nadawat nga derektiba ang Task Force Davao kalabot sa bag-ong mando.