Nagpaalala ang Olongapo City Police Station 3 sa publiko laban sa mga snatcher lalo na ngayong malapit na ang holiday season.
Ito ay matapos na may maarestong suspek sa pang-i-snatch kahapon ang Station 3.
Ayon kay Station Commander Pmaj. Edmer Gloria, modus umano ng lalaking suspek na susundan ang biktima at unit-unting binabangga habang siksikan ang mga taong naglalakad.
Nangyari aniya ito kahapon sa may Magsaysay Drive kung saan sinundan ng lalaking suspek ang babaeng biktima para makuha ang cellphone nito.
Naramdaman umano ng biktima na wala na ang kanyang cellphone dahil nakakonekta ito sa headset kaya nang nawala ang tugtog na pinakikinggan ay agad niya itong napansin atsaka nakita ang suspek.
Agad naman nakapagreport sa mga pulis na nasa lugar ang biktima kaya nahabol ang suspek kung saan tumulong rin umano ang ibang sibilyan na nasa lugar at umabot sa Lindayag St.
Dahil dito paalala ng mga otoridad na maging alerto lalo na sa mga tulad nitong modus.//Jen Bayot-BNFM OLONGAPO
