LEGAZPI CITY – Nasa diskresyon man giraray kan mga lokal na gobyerno kan mga lugar sa Albay na apektado kan Bulkang Mayon an pagpapauruli sa mga evacuees dawa pa igwa na nin ibinaba na decampment advisory an Provincial Disaster Risk Reduction and Management Council (PDRRMC) kasuudmang ala una nin hapon.
Segun ini kay Governor Atty. Edcel “Grex” Lagman kun sain dugang pa niya na an nasambit na abiso, saro sanang giya nganing igwa nin basehan an mga lokal na gobyerno sa pagpapa-decamp kan mga bakwit.
Apwera digdi, ini man an basehan kun pano sinda maga-comply sa mga decampment protocols. Basado su boot sa siyensya asin sa verifiable na datos kan APSEMO asin PHIVOLCS an nagin desisyon ninda nganing magbaba nin decampent order.
Mientrastanto, pigsyerto kan gobernador na makakaresibe pa nin mga ayuda hale sa gobyerno-nasyonal asin probinsyal an mga bakwit dawa pa pinauruli na an mga ini.