Nakataeana nga masumite ro daywa ka gurpo it andang mga bid sa pagpatindog it Panay-Guimaras-Negros Bridge project, base sa Department of Public Works and Highways (DPWH).
Ro Yoshin Co. at Sambo Engineering and Construction Co. nga nakabase sa South Korea hay ginaasahan nga magasumite it andang bid proposals para sa detailed engineering design (DED) it nasambitan nga tulay hasta Setyembre 23, 2022.
Ro DED hay pagapondohan sa idaeom it loan halin sa Korea Export-Import Bank ag raya hay bayran sa suoed it 40 dag-on nga uwa it interes.
Ro balor it DED hay nagaabot sa kapin sa P3.3 bilyon.
Nagapati ro gobyerno nga mas mapanami it Panay-Guimaras-Negros bridge ro transportasyon ag baeayluhan it produkto ag serbisyo sa bioeg nga rehiyon./JIL B. LACSON