Muling nasama ang Pilipinas sa “gray list” ng global dirty watchdog kung saan isasailalim sa increased monitoring dahil sa kabiguang matugunan ang money laundering, terrorist financing, at proliferation financing.
Sa report na inilabas noong nakaraang linggo, inilagay din ng Financial Action Task Force ang Haiti, Malta, at South Sudan sa watch list at tinanggal ang Ghana matapos makapagtala ng progreso laban sa money laundering.
Ayon kay Atty. Mel Georgie Racela, executive director ng Anti-Money Laundering Council Secretariat, may ipinunto ang FATF na ilang pagkukulang sa pagpapatupad sa Pilipinas ng anti-money laundering at counterterrorism financing efforts.
Ito ay sa kabila ng pagpasa ng bansa sa Republic Act 10927 o ang amendment to the Anti-Money Laundering Act noong 2017 at RA 11479 or Anti-Terrorism Act of 2020.
Noong 2000, inilagay na ng FATF ang Pilipinas sa blacklist dahil sa kawalan ng kapangyarihang pigilan ang money laundering at panagutin ang mga indibidwal na sangkot sa terrorist financing.
Pero noong 2005, tinanggal ng watchdog ang Pilipinas sa listahan ng non-cooperative countries at territories matapos ipatupad ang AMLA.
Ngunit dahil sa deficiencies sa batas at regulasyon, isinama ang Pilipinas sa gray list noong 2010 at na-downgrade pa sa dark gray list noong 2012 o last warning na ibinibigay sa non-complying jurisdictions at pagkatapos ay iba-blacklist na ng organisasyon.