Nag-evacuate na ang pila ka mga pumuluyo sa apat ka barangay sa syudad sang Roxas matapos nahibaluan nga nagsulod na sa Philippine Area of Responsibility ang Super Typhoon Mawar kag may local name nga Bagyong Betty.
Naglab-ot sa 92 ka indibidwal ang nag-evacuate sa diin ang Brgy. Culasi ang may yara sang nabalhag nga pito ka pamilya, apat ka indibidwal sa Brgy. 10, Brgy. Loctugan nga may yara sang 12, kag 69 naman sa Brgy. Uno.
Sa interview sang Brigada News FM kay Martin Antonio Pimentel, Punong Barangay sang Brgy. Uno, ginpahayag sini nga kagab-i palang sang Biyernes may yara na sila sang evacuees nga 56 ka pamilya nga ginakabug-usan sang 69 ka indibidwal.
Suno kay Pimentel, masami nga ginabaha ang nasambit nga lugar gani kun mabaskog na ang ulan gilayon nila nga ginapanugyanan ang mga pumuluyo nga mag-evacuate na kag indi na paghulaton nga magtaas pa ang tubig.
Dugang pa sang Kapitan, gilayon sila nagpatigayon sang rekorida sa ila lugar matapos mahibaluan nga may yara sang super typhoon nga magasulod sa PAR.
Ginpahayag man sini nga preparado gid ang ila barangay kag nagapasalamat man ini sa mga pumuluyo nga nagakooperar sa kasubong sini nga sitwasyon. | Judy Ann Juare