Hiniling ng Cauayan City Police Station na mailipat sa tanggapan ng BJMP Cauayan City ang mga Person Under PNP Custody (PUPC) o mga pansamantalang nakakulong sa kanilang lock-up cell habang dinidinig ang kanilang kaso.
Sa panayam ng 92.9 Brigada News FM Cauayan kay PLt. Scarlette Topinio, ang tagapagsalita ng PNP Cauayan, sa ngayon ay nasa 28 na PUPC na kinabibilangan ng 3 babae at 25 na kalalakihan ang kasalukuyang nasa lock-up cell ng PNP Cauayan City.
Aniya, hiniling ng kanilang istasyon na pinapangunahan ng kanilang hepe na si PLtCol. Gerald Gamboa ang paglipat sa mga PUPC sa kustodiya ng BJMP Cauayan upang maiwasan ang siksikan at mamintina ang pagsunod sa physical distancing.
Dagdag pa ni PLt. Topinio, nasa 20 lamang ang maximum na kayang iokupa ng kanilang lock-up cell.
Sa ngayon aniya, mula sa 28 na PUPC ay mayroon nang 7 rito ang hinihintay na lamang ang kanilang commitment order upang mailipat na sa BJMP.
Habang mula naman noong May 31 – June 2, 2021 ay nasa 11 nang PUPC ang nailipat.
Samantala, wala naman umanong problema sa paglipat ng mga PUPC basta’t mayroon umano silang commitment order at masusunod ang mga health protocols ng BJMP Cauayan.