Gin aprubahan eon it Sangguniang Bayan it Kalibo ro sangka resolusyon nga nagahinyo sa pamunuan it LGU Kalibo ag Transport and Traffic Management Division TTMD nga magpatigayun it inspeksyon ag ipagbawae ro pagbutang it espihu sa sueod it sidecar sa idaeum it prente it passenger seat sa tanan nga pampasaherong tricycle sa banwa it Kalibo.
Base sa resolusyon nga gin author ni SB Member Ronald Marte, ro nakabutang nga espihu sa sueod it mga tricycle hay nagatao it kahuy-anan ag bukon it komportableng pamatyag sa mga pasahero partikular sa mga kababaihan eabi eon kung ro mga raya hay nakasuksok it palda.
Tinutuyo it nasambit nga resolusyon nga mataw-an it proteksyon ro mga pasahero eabi eon ro mga kababaihan nga mabiktima it pagpangbastos. // ANN DESLENE SALAZAR