Wala na natabang sa mga doktor ug nabugtoan sa kinabuhi ang tag-iya sa Crocodile Park nga si Philip “Sonny” Dizon, 64 anyos human kini nadisgrasya sa gimanehong motorsiklo alas-11:46 kagahapon sa udto sa Gumamela St, Bansalan-Balutakay Road, Davao Del Sur
Sa imbestigasyon sa Bansalan Municipal Police Station, gisubay ni Dizon sakay sa iyang three-wheeler Can-Am nga motorsiklo ang Bansalan-Balutakay road ug padulong kini sa Balutakay, Brgy. Managa nga naggikan dinhi sa Davao City.
Pag abot sa lugar diin nahitabo ang insedente, niliko ang laing sakyanan sa pikas nga lane, ug iyang nabantayan ang laing mga sakyanan hinungdan nga ni-brake si Dizon, apan nawad-an siya sa kontrol nga maoy hinungdan nga nabalintong ang iyang motorsiklo.
Nakaangkon og grabeng samad sa nagkadaiyang parte sa lawas ang biktima, dali pang gidala sa Davao Del Sur Provincial Hospital sa Digos City sa mi-responding team sa MDRRMC, apan nabugtoan gihapon kini sa iyang kinabuhi.
Si Philip Dizon, gawas nga iladong negosyante sa Davao City, nahimo usab siya nga chairman sa American Chamber of Commerce Mindanao.