Pahibalo sa tanang mananagat ug sa mga sakyanang pang dagat nga naga agi sa kadagatang sakop sa Samal Island.
Temporaryo una nga gisuspende sa Coast Guard District Southeastern Mindanao ang paglayag sa tanang matang sa sakyanang pandagat nga ga-agi sa kadagatang sakop sa Samal Island, gumikan sa kusog nga hangin.
Samtang, gipahimangnuan sab niini ang tanang mulayag nga mag-igmat ug pabiling vigilante sa pagmonitor sa daut sa panahon.
Mamahimo lamang nga i-resume ang paglayag sa higayon nga ila nang i-anunsyo kung mubalik na ang maayong dagan sa panahon ug maayo na ang kondisyon sa kadagatan.
Sa pikas bahin, gideklara sa probinsiya sa Davao Occidental nga suspendido ang klase sa tanang lebel ug trabaho sa eskwelahan karong adlawa, Nobyembre 20-21, 2023.
Kini nunot gihapon sa nahitabong magnitude 6.8 nga linog niadtong milabay’ng Biyernes, Nobyembre 17, 2023.
Gipahimangnuan ang tanang School heads, safety officers, ug uban pa nga magpahigayon og paspas ug bug-os nga inspeksiyon sa tanang school buildings aron nga masiguro ang siguridad sa mga estudyante, magtutudlo ug mga empleyado.