Personal nga gibisita kagahapong adlawa, Noyembre 19, 2023 ni Vice Presidente Sara Duterte ang mga naapektohan sa kusog nga linog sa milabay’ng Biyernes.
Partikular nga giadtuan ni VP Inday ang Ladera Funeral Homes sa Glan, Saranggani ang mag-inahan nga namatay gumikan sa landslide nga nahitabo sa sa ilang gipuy-an sa Barangay Mudan, probinsiya sa Saranggani.
Mipaabot og pahasubo ang ikaduhang pangulo sa mga nabiling pamilya sa mga namatay.
Samtang, gipaabot sab niini ang pahasubo ni Pangulong BongBong Marcos isip caretaker samtang toa pa sa laing nasud ang pangulo.
Sumala pa ni Inday nga subo man pamalandungon nga dunay namatay gumikan sa trahedya, apan walay instrumento nga makasulti sa pag-abot sa linog mao kinahanglan andam sa kanunay.
Samtang, gibisita sab ni VP Inday ang Saranggani Provincial Hospital – Glan aron nga personal nga kumustahon ang kahimtang sa duha ka indibidwal nga nadala sa ospital human sa nahitabong disaster.
Giawhag sa ikaduhang pangulo ang katawhang Pilipino nga pabiling lig-on ug magtinabangay aron nga subling makabangon sa nasinatiang trahedya.