DUHA ka pahalipay ang naadto sa usa ka swerte nga inahan nga nitambong sa Prenatal Orientation sa Family Planning unit sulod sa Dr. Jorge P. Royeca Hospital Mayo 24, 2023.
Si Jessa Sampilo, 26-anyos nagpuyo sa Barangay Dadiangas South, mabdos sa ikaduhang beses ug wala pa niini nasayran ang gender sa iyang anak.
Ang iyang bana nga si Romulo Cagara Jr. nagatrabaho sa Gensan Fishport, kaluha usab ang ilang unang gianak usa ka lalaki ug usa ka babaye.
Sa raffle draw nakakuha siya og coupon nga may tsansa nga modaug ug usa ka libo ka pesos unya iyang pangalan usab ang nabunot sa libre nga pa ultrasound.
Mokabat sa 46 ka mga inahan nga mabdos gikan sa managlahi nga barangay sa General Santos City ang nakadawat og infant kits, nga ang sulod lampin, kalo ug medyas sa bata.
Lima usab kanila ang nakadawat og coupon unya lima ang nakadawat og special kits nga adunay alcohol, sabon, ug maternity pad.
Gumikan niini ang labaw sa Family Planning unit nga si Midwife II Merchel Gabonada nagapasalamat sa advocacy sa Brigada nga End Stunting Now,tumpak daw kini sa programa usab sa ilang opisina nga responsible parenthood,ug breastfeeding aron ma amoma pag ayo ang mga kabataan.
Gidasig usab ni DJ Baby Kho ang mga inahan, gitawag niini nga gasa ang mahimong inahan.
Samtang gipasabot ni Brigada Richel Gubalani ang kamahinungdanon sa suporta sa ginikanan ngadto sa mga anak gikan sa sabakan hangtud sa pag anak aron diritso ang pagtubo ug dili makulangan sa gikinahanglan sa lawas sa bata.
Ang End Stunting Now activity sa Brigada sa Family Planning Unit ginahimo matag adlaw nga Miyerkules. I Ver Diazon