Makatilingalahan, Ini amo ang tawag ni Vice-Mayor Roel Yogore sa banwa sang Valladolid may kaangtanan sa kaso sang Lambda variant sang Covid-19 sa ila sini lugar kun sa diin inbolbado ang Isa ka 35 anyos nga iloy nga sadtong nagligad lamang nga Hulyo 22, 2021 nagbun-ag sang iya sini nga lapsag.
Ginpaalinton ni Yogore, ginhatagan siya sang update sang ila nga Municipal Health Officer nga si Dr. Nelson George de la Fuente nahanungod sa nasambit kaso kun sa diin para sa iya nga kun lantawon ang history halin sa pungsod Peru sa South America sa diin naghalin ang Lambda variant, tuman kalayo ang distansya sa banwa sang Valladolid nga para sa iya tama ka impossible nakaabot sa ila nga banwa ang nasambit nga variant sang Covid 19.
Bangud nagguwa na ang report sang DOH sandig man sa resulta sang genome sequencing sang Philippine Genome Center, ang pagahimu-on na lamang sang banwa amo ang pag-verify. Dugang pa ni Yogore, isa ka maayo nga balita para sa mga taga-Valladolid kag sa bug-os nga probinsya sang Negros Occidental nga nag-negatibo ang nasambit nga iloy upod ang iya sini nga anak matapos ginpaidalom sa RT-PCR test sadtong lunes nga adlaw.