WALA’Y natala nga ‘significant’ untoward incident ang kapulisan sa GenSan atol sa pagsaulog sa kapaskohan, butyag ni Police Col. Nicomedes Olaivar Jr., director sa GenSan City Police Office (GSCPO).
Matud ni Olaivar, ‘generally peaceful’ ang siyudad ug walay natala nga dagkong insidente. Apan natala sa GSCPO ang insidente sa bangga, away hubog ug insidente sa pagpangluba asa gilayong nasikop ang suspek.
Dugang ni Olaivar, dili tugotan sa kapulisan ang pipila katao o grupo nga gubuton ang pagsaulog sa kapaskohan sa katawhan.
Pipila usab ka presinto sama sa Tambler Police Station nga sakop ang dagkong barangay sa siyudad ang nakatala og zero crime. Gisiguro usab nila nga magmalipayon ug luwas ang katawhan sa pagselebrar sa Kapaskohan.
Giawhag ni Olaivar ang katawhan nga maghiusa sa mga hagit nga moabot sa sunod nga tuig. Liboan ka pulis sa GSCPO ang gipakatag sa mga simbahan, malls, beach resort ug uban pang vital installation sa GenSan.