DILI na modawat og walk-in transactions ang Department of Social Welfare and Development (DSWD) Region 12 alang sa mga gustong maka-avail sa educational assistance alang sa mga student-in-crisis.
Kini ang gibutyag ni DSWD 12 regional information officer Dennis Domingo II aron nga dili na masubli pa ang nahitabo niadtong Agosto 20, 2022 nga pagdagsa ug paghuot sa mga estudyante ug mga ginikanan sa mga satellite offices sa DSWD ug Crisis Intervention Unit (CIU).
Segun ni Domingo nga may tulo ka pamaagi sa pag-apply alang sa cash aid: una, pinaagi sa mga dop boxes nga ibutang sa mga local social welfare offices ug CIU; ikaduha, ang pag-email sa [email protected]; ug ikatulo pinaagi sa online registration link nga https://bit.ly/dswdxii_aics_educational_assistance o QR Code nga makita sa DSWD XII Facebook page.
Ang mga nag-apply makadawat og confirmation text message sa kung asa ug kanus-a sila moadto sa mga pay-out venues o distribution sites alang sa assessment, validation ug releasing sa ayuda.
Ang mga nakadawat lamang og text confirmation ang mahimong moadto sa nahisgutang mga distribution sites.
May schedule na usab sa distribution ang DSWD 12 alang sa uban pang mga lugar.
Ang cash aid nga ihatag sa DSWD ang ilalom sa Assistance to Individuals in Crisis Situation (AICS).
Tumong niini nga matabangan ang mga student-in-crisis sa ilang gastos sa tuition fees, school supplies, transportation allowance, ug uban pang school-related expenses.
Ang mga elementary students makadawat og P1,000, P2,000 sa junior high school, P3,000 sa senior high school ug P4,000 sa mga college students.