PATAY na sa dihang napalgan sa mga kabataan nga sayong nag-jogging sa dakung dalan sa Purok Maleng, Barangay San Jose ang usa ka babaye ug lalaki nga taga Purok Maligaya sa susama nga barangay.
Unang nagpaabot og impormasyon sa Brigada si Carlito Dela Paz nga usa ka clan leader, sumala niini nga duha ka patay nga lawas ang napalgan daplin sa dalan ug may mga samad sa liog ug ubang bahin sa lawas, may nakita pa sila nga wire sa telepono nga posibling gigapos sa lalaki unya gihulog sa lugar.
Ang mga biktima nagpuyo lang sa ilang area ug wala sila masayod kon unsa ang hinungdan sa kremin kay wala silay nadawat nga impormasyon.
Samtang sa pahayag sa usa ka lola nga si Sarifa Makilang, nakuratan usab sila sa panghitabo, ang nailhan lang niya ang babaye nga naila daw sa bansagon nga Lenebel nga taga Sitio Lumbang, San Jose samtang wala siya nakaila sa lalaki.
Wala dayon naklaro ang mga pangalan sa mga biktima, pasado alas 7 sa buntag niabot ang pamilya sa lalaki ug dinhi naghinilakay samtang ginababagan sa kapulisan aron dili mahilabtan ang mga patay kay ginapaabot pa ang taga Soco.
Usa ka iyaan sa lalaki ang nahinabi sa Brigada nga si Merly Usman Tarona nga nagpuyo sa Barangay San Jose, gikumperma ni Tarona nga iyang kabanay ang lalaki ug ang tinuod nga pangalan Dario Kiyon, may lima ka kabataan sa unang asawa nga anaa karon sa Davao.
Samtang ang babaye sumala niini nga ikaduhang asawa ni Dario, nagpangalan daw kini og Genebel Jamil nga gikan sa Gawan area, mabdos daw og duha ka bulan.
Gidugang ni Tarona nga si Dario ilang Leader sa kayutaan sa San Jose Ug wala usab siya masayod kon aduna kini nakaaway.
Niabot usab ang taga Soco aron i- proseso ang crime scene samtang gikuhaan og impormasyon sa imbestigador sa Fatima PNP ang pamilya sa mga biktima. ( Ver Diazon)