Nasalbar ru 3 mga Aklanong mangingisda nga na stranded sa Sibuyan Island sa Romblon matapos hampason it mabaskog nga baeod dahil sa Hanging Habagat.
Nakilaea ru mga biktima nga sanday Rodrigo Flores, 34 anyos, boat captain, Cris Brigido, 19 anyos, ag Francis Dave Legarda, 19 anyos, tanan mga residente it Brgy.Bobog, Numancia, Aklan.
Suno kay Cris Brigido sa BRIGADA News FM Kalibo, koeba, gutom ag kahadlok ru andang nabatyagan samtang gina hampas it baeod apang gin isog lang gid sigun nanda ru andang boot para maisalbar ru andang mga kaugalingon.
Dahil sa mabaskog nga humbak sa eawod, nasamad ru katig it baroto nga andang gina sakyan hasta sanda hay naisalbar it mga residente sa lugar.
Gin panao lang nanda ru andang nadakpan nga mga isda sa mga residente nga nag salbar kanda nga gina komponehan eamang it 2 pamilya.
Nasayuran nga may kapin sa 5 adlaw sanda nga na stranded sa kadagatan it New Washington bago na adto sa Sibuyan Island.//MARIVIC Y. ILIN