PERSONAL nga gitutukan ni Mayor Lorelie Geronimo Pacquiao ang gipahigayung Mock Assessment alang sa Seal of Good Local Governance kun SGLG bag-uhay lamang sa Pandan Hall sa Greenleaf Hotel, sa GenSan.
Sa pagpanguna sa Strategic Performance Management and Compliance Office kun SPMCO pinaagi ni Glennville Gonzales, nagkatigom ang mga Department Head, Division Chief, ug mga empleyado sa LGU-GenSan.
Tumong sa maong panagtigom nga makamugna og mga pamaagi aron mamintina ang SGLG nga nakuha sa GenSan miaging tuig.
Kauban sa SPMCO ug LGU heads ang mga personahe gikan sa Department of Interior and Local Government kun DILG sa pagpanguna ni City Director Rilimin Sandoval.
Nasayran nga kinatibuk-ang 350 ka mga local government units sa tibuok nasud ang gipasidunggan og 2022 Seal of Good Local Governance kun SGLG miaging tuig tungod sa ilang exemplary performance luyo sa dili paborableng panahon sa pandemya.
Aron makakuha sa SGLG, ang mga LGU kinahanglang makapasa sa tanang 10 ka governance, nga gilangkuban sa Financial Administration & Sustainability; Disaster Preparedness; Social Protection & Sensitivity; Safety, Peace and Order; Health Compliance and Responsiveness; Sustainable Education; Business Friendliness & Competitiveness; ug Environmental.