ALERTO ang mga tigbantay sa Bulaong terminal sa Gensan sama sa mga CSU dungan sa labing ulahing insidente sa pagpamomba sa unit sa bus sa Isulan, Sultan Kudarat alas-12:20 sa hapon, Abril 17 nga gikasamad sa pito katao.
Sumala sa nakaduty nga CSU sa gabei sa Bulaong nga si Victor Jugarap pagkahuman sa insidente gilayon naghatag og direktiba ang ilang labaw nga si retired PLt. Col. Renato Salarda, nga imonitor ang palibot sa terminal lakip ang tanang bus nga nagaabot sa last trip gikan sa laing lugar.
Giangkon ni Jugarap nga bisan mas daghan ang pasahero sa adlaw kung itandi sa gabei wala matud pa sila nagakompyansa gumikan delikado kung dunay makasulod nga tawo sa syudad unya magdala og eksplosibong butang.
Maoy rason sa gihimo niining 24-oras nga monitoring sa CCTV camera sa lugar. Gawas sa mga security personnel naa usab ang mga drayber, ug vendors nagatabang og monitor sa terminal, alerto usab sila sa mga ginabilin nga bagahi.
Ang panawagan karon sa otoridad alang sa katawhan nga magbinantayon kanunay ug gilayon nga i-report sa kapulisan kung dunay makita nga kadudahang butang sa palibot. I Enamie Mogpon