KALIBO, AKLAN—Nagakinahangean it kadugangan nga nurse (contract of service status) do Dr. Rafael S. Tumbokon Memorial Hospital (DRSTMH).
Raya hay para sa kadugangan nga manpower sa nasambit nga ospital eabi eon sa pagtao it serbisyo sa mga naka-confine sa COVID-19 ward.
Mag-eowas sa pag-hire it mga nurse, nauna eon nga ginpahayag ni Governor Florencio Miraflores nga planong dugangan do duty hours’ it mga heath care workers ag do ibang personnel sa mga district hospital hay iga-reassign sa COVID-19 referral facility agud nga mag-augment sa mga nakakabatyag eon it “COVID fatigue” nga mga doctors ag nurse’s it provincial hospital.
Sa pihak nga parte, bangud sa padayon nga paglobo it kaso sa kabisera it Aklan, nag-deploy it 50 policeman sa mga strategic areas agud nga mamonitor do pagpatuman it minimum health standards eabi eon sa mga interior barangays it Kalibo. // SHERRY ANNE REUNIR-VIDAL