Inihayag ng Department of Environment and Natural Resources (DENR) na kabilang sa Expanded National Greening Program (ENGP) ng pamahalaan ang rehabilitasyon ng 70-hectars ng Upper Marikina River Basin Protected Landscape (UMRBPL).
Ito’y matapos nilang pirmahan ang memorandum of agreement kasama ng Government Service Insurance System (GSIS) kung saan kabilang din ang D.M. Consuji Incorporated (DMCI), Toyota Oben Group of Dealers (TOGD) at ng Meralco Industrial Engineering Services Corporation (MIESCOR).
Ayon kay Provincial Environment and Natural Resources for Rizal Ramil Limpiada, ibinalik sa DENR ang mga lugar ng ilang organisasyon at lokal na pamahalaan matapos isakatuparan ang tatlong taong kontrata sa pagpapaunlad ng kanilang kalikasan.
Magbibigay ang DENR ng P3.1 million na pondo at P2.01 million naman galing sa GSIS na tutuon para sa maintenance at proteksyon ng 56-hectars ng National Greening Program (NGP) tree plantation.
Samantala, hahawakan ng Meralco ang isang ektarya ng ENGP plantation site at DMCI naman ang bahala sa 10-hectars ng NGP. Ang 3-hectars ay hahawakan naman ng TOGD. (ARGIE ERGINA)