WALA nay gana pa nga subling iduso sa konseho ni Kagawad Franklin Gacal Jr. ang anti epal ordinance nga nagtumong matud pa nga dili pahimuslan sa mga elected officials ang posisyon aron makapahumot sa publiko.
Matud ni Gacal nga bisan muduso siya og amendments subay sa kagustuhan sa wala mipabor sa unang pagduso niini, basin pag-abot sa botasyon, dili gihapon kini makapasa.
Alang usab kang Kagawad Jose Edmar Yumang, dili lang magpakawala og paglaom si Gacal tungod kung gisuportahan ni Kagawad Rosalita Nuñez nga anaa sa pikas partido, possible pang mausab ang hunahuna sa ubang konsehal.
Una nang gitino ni Yumang nga ang gustong mahitabo nga dili apilon ang mayor tungod may mandato subay sa balaod ug apilon usab ang mga national elected officials.
Alang usab kang Gacal, giduso ang maong ordinansa aron ma-streamline ang proseso sa ayuda ug dili alang sa benepisyo sa pulitiko apan sa katawhan.
Kahibaluan nga sa unang pagduso ni Gacal, upat ang mipabor ug pito ang misupak.