NAPAIG-PATAY ang tulo ka tawo human nasunog ang bus didto sa Brgy. Bialong, M’lang, Cotabato alas-4:30 kaganihang hapon.
Sa gipahigayong coverage sa Brigada news FM-Kidapawan, ang bus nga nasunog adunay body number A-104, adunay sakay nga siyam ngadto sa napulo ka mga pasahero ug gikan dinhi sa Kidapawan City.
Sa pag-interview sa Brigada sa usa sa mga pasahero, gibutyag niini nga nihunong ang bus kay adunay misaka nga inspector ug iyaha matud pang nakita ngadto sa duol sa driver nga adunay misirit nga gasolina, ug dayon ni-aso ug namugna ang kalayo.
Nangataranta matud pa sila nga mga pasahero, ug nag-iyahay og ambak gikan sa bus didto agi sa bintana. Gilayong miresponde ang mga residente sa Bialong ug nagtinabangay ang mga tawo sa sa pagbuak sa salamin sa mga bintana sa likod nga bahin sa bus aron nga adunay maagian ang mga pasahero.
Sa dihang napalong ang kalayo, skeleton na lang sa mga bintana sa bus ang nabilin, ug nakaplagan ang tulo ka mga tawo nga nangapaig sa luyong bahin sa sakyanan.
Wala gilayon gikuha sa mga otoridad ang mga patay’ng lawas sa bus, tungod gihulat ang pag-abot sa EOD team, aron mapanigurong walay eksplosibo ang nahisgutang bus. – BNFM KIDAPAWAN