Nagplano ang Cebu City Government nga makigtambayayong sa pribadong sektor sa pagpamalit o pag-abang og mga helicopter ug fire service ladders aron magamit sa mga insidente sa sunog nga naglambigit sa tag-as nga mga edipisyo.
Subay niini, gimanduan ni Cebu City Mayor Michael Rama ang mga executive head, lakip na si City Administrator Collin Rosell, nga paspasan ang pagpalit sa mga personal protective gears sama sa mga mask nga adunay mga filter ug breathing apparatus nga gamiton sa mga bombero ug uban pang responders.
Magpatawag usab ug tigom ang Mayor sa mga departamento ug buhatan, mga barangay ug pribadong sektor ilabi na sa mga tag-iya og tag-as nga mga edipisyo aron makahimo sila ug komprehensibong nga mga lakang ug polisiya.
Ang maong plano nitumaw human sa sunog nga miigo sa Grand Residences condominium nga nilungtad og siyam ka oras ug miresulta sa danyos nga mokabat sa halos P4 bilyunes.//