Gikumpirma sa Davao City Police Office nga walay terror threat nga nadawat ang security sector sa syudad nunot sa impormasyon nga gipagawas sa Japanese Embassy sa Manila sa posibleng ‘terror attacks’ sa Southeast Asian countries.
Sumala kang Davao City Police Office kun DCPO City Director Pol. Col Kirby John Kraft sa virtual press conference, bisan walay nadawat nga susamang impormasyon apan nagpabiling alerto ang ilang mga sakop.
Gani kanunay matud pa naka-high alert ang pwersa ilabi na sa mga borders aron dili malutsan og terorista sama sa nahitabong Roxas Night Market Bombing lima ka tuig na ang nakalabay.
Kauban sa DCPO sa pagbantay ang Task Force Davao ug ubang law enforcement unit.
Kagahapon usab nagpahigayon og pulong ang nagkadaiyang security forces aron hisgutan ang maong isyu ug aron planuhan kung dunay ipatuman nga dugang aksyon o lakang aron protektahan ang dakbayan sa Davao.
Sa laing bahin una nang gisiguro sa Department of National Defense nag walay angay ikaalarma ang publiko sanglit kontrolado sa gobyerno ang sitwasyong pangseguridad sa nasud pinaagi sa Anti – Terrorism Council.
Matud kang Defense Spokesman Dir. Arsenio Andolong. Tanang impormasyon ipailawum sa hugot nga beripikasyon ug validation busa makalaum ang publiko nga napugngan na ang bisan unsang hadla ayha pa man kini muulbo.BNFM-DAVAO
