GENERAL SANTOS CITY– MALAMPUSON nga nag-courtesy call o nakigtabo ngadto kang Gensan City Mayor Ronnel Rivera ang bag-ong labaw sa DepEd- Region 12 nga si Carlito Rocafort.
Nagtagbo ang duroha sulod mismo sa buhatan sa Alkalde sa City Hall ning s’yudad sa General Santos.
Kuyog ni RD Rocafort sa pakigtagbo sa amahan sa s’yudad sila Gensan Schools Division Superintendent Romelito Flores ug uban pang opisyal sa DepEd Gensan.
Sa maong higayon, nakigdayalogo ang labaw sa DepEd-12 ngadto kang Mayor Rivera ug gisuta niini ang kahimtang sa edukasyon sa dakbayan ug ang mga suporta sa lokal nga kagamhanan sa hagit karon nga gisagubang sa sektor sa edukasyon.
Nahimo gayud nga mabungahon ang panagtagbo sa duroha human nagkasabot nga magsuportahay sa edukasyon sa mga kabataan ning dakbayan. Sa karon nga panahon, kinahanglan gayud ang matag-opisyal sa gobyerno lokal man o nasyonal nga ahensiya ang magtinabangay, hilabi na sa natad sa edukasyon isip preparasyon sa mga kabataang estudiyante alang sa maayo nilang kaugma-on.