BICOL – LIWAT nagpagiromdom ngunyan an Department of Health sa mga Bicolano na mayong pinipiling edad o gender an tatamaan nin covid-19 kun kaya aram kanlambang saro an mga gigibohon na pag iingat para sa bilog na pamilya.
Katakod kaini, nagluwas an ahensya nin home care guide para sa mga kaakian para mamantiner na protektado an mga ini laban sa malalang epekto kan virus.
Dapat soboot maging “aware” an mga magurang, dahil posible man na makaeksperiensya nin sintomas nin covid-19 siring kan kalintura, ubo, sipon asin kawaran nin ganang magkakan asin kun maglala asin napabayaan pwedeng magresulta sa pagkawara nin pamarong asin pagnamit.
Apwera sa health protocols na “Mask-Hugas-Iwas-Airflow” asin pagpapabakuna. Importante soboot aram kan mga magurang an mga dapat gibohon oras na magpahiling nin sintomas an aki.
Importanteng igwang nakasaray na thermometer asin pulse oximeter tanganing ma-monitor an temperatura asin oxygen level.
Nagkapira man sa mga dapat tawan atensyon an kolor kan ihi kan pasyente siring man tawan nin masustansyang pagkakan asin tubig, asin kun breastfeeding idagos sana an pagpapasuso.
Dai soboot mag duwa duwa na mag apod nin doktor o darahon an aki sa emergency room oras na magpahiling an mga ini nin sintomas nin dehydration, nadidipisilan asin nagririkas na paghangos , malungsi o kolor asul an gilid kan ngabil siring man kun bumaba sa 95% an oxygen level kaini.