Nagpahigayon og election seminar ang mga tropa sa 25th Infantry Battalion, ilalom sa 1001st Infantry Brigade sa ilang Headquarters sa Camp Kalaw, Poblacion, Monkayo, Davao de Oro kagahapong adlawa, Oktubre 23, 2023.
Mitambong sa maong seminar sila Brigadier General Ronnie B Babac, Brigade Commander sa 1001st Brigade isip Guest of Honor ug Speaker kauban ni Davao de Oro Provincial Election Supervisor. Atty. Emelie D. Camaganacan.
Gipasabot ni Atty Camagnacan ang papel sa mga miyembro sa Armed Forces of the Philippines isip deputized agents nga musuporta sa Barangay ug Sangguniang Kabataan Election 2023.
Gibutyag sab sa opisyal ang mga gidili atol sa ilang katungdanan panahon sa eleksiyon.
Samtang, gipahinumdoman sab ni Brigadier General Babac ang mga tropa nga magpabiling apoliticalug mag-amping samtang nagtuman sa ilang mga katungdanan.
Dugang pa niini nga isip Peacekeepers ug deputized agents sa Commission on Election karong umaabot nga BSKE 2023, magpabilin sumala pa nga walay gidapigan ug lig-on sa katungdanan.
Mahinungdanon sumala pa ang papel sa mga sundalo karong eleksiyon hinungdan nga sigurohong mapabilin ang demokratikong proseso ug mamahimong hapsay ug walay mahitabong kakulian.
Samtang, usa sa mga inisyatiba sa 1001st Brigade mao ang pagbutang og tarpaulin sa kilid sa mga sakyanan sa militar, pagdasig sa katawhan sa paggamit sa ilang katungod sa pagbotar karong umaabot nga eleksyon.